Psa 81 | NdeIBE | STEP | Kumqondisi wokuhlabela. Elika-Asafi Hlabelelani ngentokozo kuNkulunkulu ongamandla ethu; memezani kakhulu kuNkulunkulu kaJakhobe!

Psalms 81

1 Hlabelelani ngentokozo kuNkulunkulu ongamandla ethu; memezani kakhulu kuNkulunkulu kaJakhobe!

2 Qalisani ukuhlabela, tshayani isigubhu, khalisani ichacho elimnandi lomhubhe.

3 Khalisani uphondo lwenqama ngeNyanga ithwasa, lalapho inyanga isigcwele, ngelanga leDili;

4 lesi yisimemezelo sika-Israyeli, umthetho kaNkulunkulu kaJakhobe.

5 Wakumisa njengesimo kuJosefa lapho aphuma wavukela ilizwe leGibhithe, lapho ezwa khona ulimi esasingaluzwa.

6 Uthi, “Ngawethula umthwalo emahlombe abo; izandla zabo zakhululwa engcebethwini.

7 Ekuhluphekeni kwenu lamemeza mina ngalikhulula. Ngaliphendula ngiphakathi komdumo weyezi; ngalilinga emanzini aseMeribha.

8 “Zwanini, hawu bantu bami, mina ngizalixwayisa – aluba lingangilalela, O Israyeli!

9 Lingabi lonkulunkulu wezizweni phakathi kwenu; lingabokhothamela unkulunkulu ongaziwayo.

10 NginguJehova uNkulunkulu wenu, owalikhuphayo eGibhithe. Vulani kakhulu umlomo wenu ngizawugcwalisa.

11 “Kodwa abantu bami kabangilalelanga; u-Israyeli wala ukungithobela.

12 Ngakho ngasengibayekela ngezinhliziyo zabo zobuqholo ukuthi balandele lokho abakufunayo.

13 “Aluba abantu bami bengangilalela, aluba u-Israyeli engalandela izindlela zami,

14 masinyane nje ngingazibhuqa izitha zabo ngiphakamisele isandla sami ezitheni zabo!

15 Labo abamzondayo uJehova bangatshotshobala phambi kwakhe, kuthi isijeziso sabo sibe ngesaphakade.

16 Kodwa lina lingaphiwa ingqoloyi enhle kakhulu; ngilisuthise ngoluju oluphuma edwaleni.”